Tehrana qarşı sanksiyalar aradan qaldırılarsa, İran Rusiyanı əsas qaz tədarükçüsü qismində əvəz etməyə hazır deyil.

Musavat.com-un məlumatınas görə, bunu İran prezidenti Həsən Ruhani "Rossiya 24" telekanalına müsahibəsində bildirib.

"İstər şərqdə, istərsə də qərbdə bizim çoxlu müştərilərimiz, alıcılarımız da var. Bizim şərq, qərb və cənub qonşularımızın hamısı bizdən qaz almaq istəyirlər, amma biz o qazı hələ hasil etməliyik. Hamı düşünür ki, əgər sabah Rusiyadan qaz tədarükü dayandırılacaqsa, İran həmin qazı tədarük edəcək. Bu gün elə bir şərait yoxdur. Bizim istehsalımız bu mərhələdən hələ çox uzaqdır", - deyə İran prezidenti bildirib.

Həsən Ruhani, həmçinin, İranın Rusiya ilə qaz sahəsində əməkdaşlıq etməyə hazır olduğunu qeyd edib. Onun sözlərinə görə, rəqabət problemli yox, sağlam olmalıdır. "Buna görə də, qaz məsələsində ən optimal yol əməkdaşlıq və qarşılıqlı əlaqələrdir. Biz Rusiya ilə birgə bütün sahələr üzrə əlaqələndirilmiş fəaliyyət aparmağa hazırıq",- deyə İran prezidenti bildirib.