İsrail yeddi ildə ilk dəfə olaraq Qurban bayramı münasibətilə Qəzza sakinlərinə Yerusəlimə keçməyə icazə verib.

Axar.az RİA Novosti-yə istinadla bildirir ki, bu barədə fələstinlilərin azadlıq hərəkatını dəstəkləyən Gişa ictimai təşkilatının nümayəndəsi məlumat verib. Onun bildirdiyinə görə, yaşı 60-dan yuxarı olan 500 nəfər Qəzza sakininə bazar günündən çərşənbə axşamınadək Yerusəlimdə olmağa icazə verilib.

"2007-ci ildən belə şey olmamışdı. Əvvəllər İsrail hökuməti xristian bayramları zamanı onlara Yerusəlimə getməyə icazə versə də, müsəlmanlara bu, yasaq idi", - deyə Gişa təşkilatının mətbuat katibi Şaya Qrünberq məlumat verib.

Qeyd edək ki, hazırda israil və fələstinlilər arasındakı münasibət əvvəlki kimi gərgin olaraq qalır. Belə ki, İsrail yeniyetmələrin oğurlanmasında HƏMAS hərəkatını ittiham edərək iyunda Qərb sahillərində son ildə ən böyük polis əməliyyatı keçirmişdi. Bu əməliyyat zamanı yüzlərlə ərəb saxlanılmışdı. Yəhudi məktəblilərinin isə cəsədləri tapılmışdı. Bunun ardınca HƏMAS-ın raket həmlələri başlamış və avqustun 26-da tərəflər arasında barışıq imzalanması ilə başa çatmışdı.