Tvitter şirkəti Kaliforniya Federal məhkəməsində FTB və ABŞ Ədliyyə Nazirliyinə qarşı iddia qaldırıb.

Associated Press-in yaydığı məlumatda bildirilir ki, şirkət rəhbərliyi Amerika xüsusi xidmət orqanlarının məhkəmə sorğularına dair informasiyaların açılmasına qoyduğu qadağanı götürməyi tələb edib.

Şirkət Konstitusiyaya edilən Birinci düzəlişə istinad edir. Belə ki, adı çəkilən sənəd söz azadlığını təmin edərək məhkəmə sərəncamlarının dəqiq sayı haqqında məlumat yaymağa icazə verir:

"Biz güman edirik ki, Birinci düzəlişə müvafiq olaraq Amerika hökumətinin apardığı təqiblərin miqyasına dair informasiya təqdim etməklə istifadəçilərimizin narahatçılıqlarına, eləcə də ABŞ hökumət nümayəndələrinin bildirişlərinə cavab vermək hüququmuz var", – deyə şirkətin vitse-prezidenti Benjamin Li bildirib.

O qeyd edib ki, FTB və ABŞ Ədliyyə Nazirliyi şirkətin təqiblərə dair sorğular haqqındakı məlumatı çap etmək xahişini rədd edib. "Qanunvericilik hətta milli təhlükəsizliyin maraqları naminə istifadəçilərin məlumatlarının açılmasına hüquq-mühafizə orqanlarından hər hansı sorğunun olmamasını elan etməyi yasaqlayır", - Li əlavə edib.