Türkiyədə Kobaniyə görə ara qarışıb. Ölkə iğtişaşların cəngində 22 can verib. İstanbul, Ankara kimi meqapolislərdə belə etirazlar var. Kürdlərin yaşadığı bölgələrdə isə qarşıdurmalar səngimək bilmir. Yalnız Diyarbəkir bu səhəri sükutla açıb.

Axar.az xəbər verir ki, şəhərdə baş verən toqquşmalarda ölənlərin olması etirazların ertəsi gününə bir sükut çökdürüb. Bu nümayişlərdə isə PKK ilə Hüda-Par arasında qarşıdurmalar yaşanıb, ikinci qrupdan 4 nəfər öldürülüb.

Türkiyənin sosial mediasında öldürülənlərin vurulma anı yayımlanıb. Görüntülərdə üzü qapalı şəxslərin izdihamın içində atəş açdığı lentə alınıb, həmçinin, bir kürd qəzetçinin yaralandığı diqqətdən yayınmır. Videonun sonunda öldürülən adamların da görüntülərinə yer verilib. Ancaq hələ də silahlıların kim olduğu bilinmir.