Tacikistanın mobil rabitə operatorları ölkədə SMS xidmətini bağlayıblar.

Axar.az xəbər verir ki, bu barədə İnterfaks agentliyinə ölkədəki mobil operatorlardan birinin adının çəkilməsini istəməyən yüksək vəzifəli əməkdaşı məlumat verib.

"Dünən axşam biz Rabitə Xidmətindən SMS xidmətlərinin dayandırılması ilə bağlı xüsusi göstəriş aldıq. Səbəbini bizə demədilər. Bunun nə vaxta qədər davam edəcəyini də bilmirik", - mənbə bildirib.

"İnterfaks"ın məlumatına görə, bu gün Tacikistanda müxalifətin mitinqi gözlənilir. Tacikistan hökuməti paytaxt Düşənbədə ciddi təhlükəsizlik tədbirləri görüb. Şəhərin əksər yerlərində blok-postlar qurulub və zirehli texnika yeridilib. Mərkəzi küçələrə isə çoxlu sayda polis əməkdaşları yerləşdirilib.

Mitinqə çağırış isə ölkədə qeyri-leqal hesab olunan "Qrup 24" təşkilatı tərəfindən həyata keçirilib. Artıq həmin təşkilat ölkənin Ali Məhkəməsi tərəfindən dünəndən etibarən ekstremist elan olunub. Baş Prokurorluq isə həmin təşkilata üzv olanları istintaqdan uzaq olmaq üçün oradan uzaqlaşmağa çağırıb.

Qeyd edək ki, Düşənbədə icazəsiz mitinqin keçirilməsinə çağırış oktyabrın əvvəlindən başlayıb. Müxalifət ölkə prezidenti İmomali Rəhmanı istefaya səsləyir.