Ukrayna sərhədçiləri Polşa ilə sərhəddə sərhəd xəttini keçməyə cəhd göstərən bir qrup gənci saxlayıb. Bu barədə xəbəri "Gazeta Wyborcza" yayıb.

Qəzetin iddiasına görə, saxlanılan Polşa vətəndaşları "Falanqa" təşkilatına məxsusdurlar və özlərini "polşalı avrasiyalılar" adlandırırlar. Onlar Ukrayna ərazisinə keçmək və qondarma DXR separatçılarına qoşulmaq istəyirlərmiş.

Sonradan bunu təşkilatın lideri Bargtoş Beker də təsdiqləyib. O, həmçinin bildirib ki, məsləkdaşları saxlanıldıqdan sonra pasportlarına üç il müddətində Ukraynaya girişi qadağan edən möhür vurulub.

"Avropa və Asiya blokları ümumi rifah naminə sıx əməkdaşlıq etməlidirlər, bununçünsə dünyanın hər yerində - Yuqoslaviyada, Əfqanıstanda, İraqda, Liviyada, Suriya və Ukraynada qanlı münaqişələr yaradan Amerika təsirini aradan qaldırmaq lazımdır", - deyə polşalı avrasiyalıların lideri bildirib.