2009-cu ildə Əfqanıstanda koalisiya qüvvələri tərəfindən həbs edilən Rusiya vətəndaşı İrek Hamidullin tezliklə Amerikaya gətiriləcək və federal məhkəmə qarşısında dayanacaq.

Axar.az xəbər verir ki, bu barədə "Vaşinqton Post" qəzeti məlumat yayıb. Hamidullin həbs olunduğu bu illər ərzində Amerikanın Əfqanıstandakı hərbi hissəsində saxlanılırdı. Bu yaxınlarda hökumət nümayəndələri onun ABŞ-a gətirilməsi haqqında Konqresi məlumatlandırıblar.

Konqress Quantanamo həbsxanasından dustaqların ABŞ-a ekstradisiyasını qadağan edib, lakin bu qanun Əfqanıstanda həbs edilmiş şəxslərə şamil edilmir.

Qəzetin yazdığına görə, Hamidullin Virciniya ştatında federal məhkəmədə mühakimə ediləcək.

Xatırladaq ki, mart ayında Rusiya XİN-in insan haqları üzrə səlahiyyətlisi Konstantin Dolqov Vaşinqtonun hələ Hamidullinin 2009-cu ildən həbs edilməsi barədə Moskvaya rəsmi məlumat vermədiyini bildirmişdi.

Hamidullin "Ət-Təkfir vəl-Hicrə" təşkilatının üzvü olmaqda, Əfqanıstanda ABŞ qoşunlarına qarşı döyüşlərdə, xüsusilə də 2009-cu ildə bir neçə nəfərin ölümü və yaralanması ilə nəticələnmiş hücumda iştirak etməkdə günahlandırılır.