Çin lideri Si Szinpinlə ABŞ Prezidenti Donald Tramp iki ölkə arasında münasibətlərin mütləq yoluna qoyulması barədə razılaşıb.

Axar.az xəbər verir ki, bunu jurnalistlərə açıqlamasında Çin Xarici İşlər naziri Van İ deyib. Onun sözlərinə görə, iki saat yarım davam edən görüş dostluq şəraitində keçib, danışıqlar isə pozitiv olub. Görüşdə tərəflər həmçinin 1 yanvardan etibarən əlavə gömrük rüsumlarının tətbiq edilməməsi və bütün əlavə tariflərin ləğvi barədə danışıqların artırılması barədə razılaşıblar.

ABŞ prezidentinin mətbuat katibi Sara Sanders isə Çinin ABŞ-dan əhəmiyyətli həcmdə kənd təsərrüfatı, enerji, sənaye və digər mallar almağa razılıq verdiyini, bununla ABŞ-la olan ticarət disbalansını bağlamağa çalışdığını bildirib. O, həmçinin ABŞ Prezidenti Donald Trampın Çinə qarşı rüsumları yanvarın 1-dən 10%-dən 25%-ə qaldırmamağa razılıq verdiyini deyib. Bununla belə Sanders 90 gün ərzində Çinlə əsas ticarət məsələlərində razılıq əldə edilməyəcəyi halda rüsumların 25%-ə qaldırılacağını vurğulayıb.