İranlı qadının namus üstündə öldürdüyü ETALAAT-ın keçmiş üzvü barədə cinayətin təfərrüatı bəlli olub.

Axar.az xəbər verir ki, Beynəlxalq Əfv Təşkilatı və beynəlxalq insan hüquqları təşkilatlarının edamın təxirə salınması üçün etdiyi çağırışlar nəticəsiz qalıb. İran 26 yaşlı Cabbarini edam edib.

Cabbari 2007-ci ildə Morteza Əbdolali Sarbandi adlı keçmiş kəşfiyyat işçisini öldürməkdə ittiham edilərək həbs edilmişdi. 2009-cu ildə isə barəsində edam qərarı verilmişdi. Son iki ay ərzində Cabbari nə ailəsi, nə də vəkilləri ilə görüşə buraxılırdı.

Məhkəmədə Morteza Sarbandinin ona təcavüz etməyə çalışdığını, buna görə də onu bir dəfə kürəyindən bıçaladığını qəbul edən Cabbari həmin vaxt orada olan başqa bir şəxsin Sarbandini öldürdüyünü iddia etmişdi.

Sarbandinin ailəsi isə cinayətin planlı şəkildə təşkil edildiyini, Cabbarinin bıçağı cinayətdən iki gün əvvəl aldığını qəbul etdiyini bildirirdi.

İnsan hüquqları təşkilatları da Cabbarinin ifadəsinin iranlı prokurorların təhdid və təzyiqləri nəticəsində alındığını, buna görə də yenidən mühakimə olunması lazım olduğunu qeyd edirdi.

BMT İranda bu il ərzində təxminən 250 nəfərin edam edildiyini açıqlayıb.

Qeyd edək ki, Reyhanə Cabbarinin edam edilməsi xəbərini vermişdik.