Avropa Şurasının sədri Donald Tusk İngiltərə Baş naziri Tereza Meyin parlamentdə bu gün keçirilməli olan Breksitlə bağlı səsvermənin təxirə salınması barədə açıqlamasına münasibət bildirib.

Axar.az xəbər verir ki, Tusk Breksit müqaviləsi və maddəsini yenidən müzakirə etməyəcəklərini bəyan edib.

"İngiltərənin təsdiqləmə prosesini necə asanlaşdıra biləcəyimizi müzakirə edə bilərik. Vaxt daralır, bu səbəbdən AB-nin müqaviləsiz ssenariyə nə qədər hazır olduğunu da müzakirə edəcəyik", - Tusk söyləyib.

Qeyd edək ki, Avropa İttifaqı ölkələrinin liderləri Breksit anlaşması ilə bağlı razılığa gəlmişdilər. Razılaşmaya görə, Britaniya 2019-cu ilin martın 29-da ittifaqdan ayrılmalıdır.

Parlament sözügedən razılaşma mətnini təsdiqləməyəcəyi təqdirdə London bu sənədsiz Birlikdən ayrılacaq ki, bu da ölkədəki duruma mənfi təsir göstərəcək.

Tereza Mey parlamentin təsdiqləməyəcəyi ehtimalının yüksək olduğunu bildirərək, bugünkü müzakirəni təxirə saldığını açıqlayıb.