İngiltərənin baş naziri Devid Kemeron ölkəsinin Avropa Birliyinin (AB) tələb etdiyi 2,1 milyard avroluq ortaq büdcəni ödəməyəcəyini açıqlayıb.

Axar.az xəbər verir ki, parlament qarşısında çıxış edən Kemeron İngiltərə iqtisadiyyatının bir çox Avropa ölkəsi ilə müqayisədə daha sürətlə inkişaf etdiyini bildirərək, indiyə kimi Birliyin bu qədər pul tələb etmədiyini deyib:

"Heç vaxt bizdən bu qədər vəsait tələb olunmamışdı. Qətiyyətlə bu miqdarı qəbul edə bilmərik. Tələb olunan pul ingilis vergi ödəyicilərinin puludur. Buna görə də bu rəqəm araşdırılmalıdır".

Baş nazir rəsmi şəkildə AB-nin tələb etdiyi pulu verməyəcəklərini bildirib:

"Biz belə bir tələbi rədd edirik. Biz bunu araşdıracağıq. AB-nin dəyişməsi və təkrar etibarını qazanması lazımdır. Milli maraqlarımızı müdafiə etməyə davam edəcəyik. AB-nin qarşıdan gələn illərdə islahatını təmin etməliyik. 2017-ci ilin sonunda Brüssel deyil, İngiltərə AB-də qalıb-qalmadığımıza qərar verəcək".

Bu arada Avropa Birliyi Komissiyasının Büdcədən Məsul Komissarı Jacek Dominik tələb olunan 2,1 milyard avronun vaxtında verilməyəcəyi təqdirdə cəza tətbiq olunacağını açıqlayıb.