12:07

Gürcüstan müxalifəti Prezident Salome Zurabişvilinin andiçmə mərasimi zamanı keçiriləcək etiraz aksiyası hazırlıqlarına başlayıb.

Axar.az xəbər verir ki, "Güc birlikdədir" müxalifət birləşməsi və tərəfdarlarının olduğu onlarla maşın paytaxt Tiflisdən Telavi istiqamətində yola düşüb.

Dinc aksiya planlaşdırdığını əvvəlcədən elan edən müxalifətin əsas tələbi növbədənkənar parlament seçkilərinin keçirilməsi olacaq. Gürcü hökuməti müxalifətin qarşısını almaq məqsədilə Telaviyə gedən ən qısa yolları bağlayıb, müxalifətin bəyanat səsləndirəcəyi meydana giriş dayandırılıb.

***

Gürcüstan polisinin Qurcani istiqamətindən Telaviyə gedən yolu bağlaması müxalifət nümayəndələrinin kəskin narazılığına səbəb olub. Bir qrup insan polis kordonunu yararaq irəliləməyə nail olsa da, yolun qarşıda yenidən bağlandığının şahidi olub. Hazırda ərazidə vəziyyətin çox gərgin olduğu bildirilir.

Etirazçılarla polis əməkdaşları arasında qarşıdurma baş verib.

Polis andiçmə mərasiminin keçiriləcəyi yerin yaxınlığında belə bir aksiyanın keçirilməsinə icazə verilməyəcəyini bir daha qeyd edib.