İraq mərkəzi hökuməti ilə İraq Kürd Muxtariyyəti arasında yaşanan “bayraq böhranı” getdikcə daha gərdin xarakter alır.

Axar.az xəbər verir ki, mərkəzi hökumətin verdiyi 24 saatlıq müddət başa çatsa da, Kürdüstan Yurdsevərlər Partiyası bayraqları endirməyi rədd edib.

Partiya təyin olunan vaxtın başa çatmasından sonra yazılı açıqlama verib. Açıqlamada İraq Kürd Muxtariyyəti bayrağının Kərkükdən asılması ilə bağlı yaranan böhranla əlaqədar İraq Federal Məhkəməsinə müraciət edildiyi və məhkəmə qərarı olmadan məsələnin həllinə nail olmağın mümkünsüzlüyü qeyd olunub. Kərkükdə partiya və təşkilat binasında İraq Kürd Muxtariyyəti bayrağının asılı qalacağının elan olunduğu açıqlamada, həmçinin, şəhərdəki hər hansı bir yerdə bayraq asılmasından partiyanın məsuliyyət daşımayacağı bildirilib.

Qeyd edək ki, 9 yanvar tarixində Kərkükdə Kürdüstan Yurdsevərlər Partiyasının bayraqları yenidən peyda olub. Partiya Kərkükün mübahisəli ərazi olduğunu və öz bayrağını asmaq hüququna sahib olduğunu açıqlamışdı. Mərkəzi hökumət isə bayraqların endirilməsi üçün 24 saat vaxt vermişdi.