Əl Qaidə lideri Usamə bin Ladenin öldürülməsi həmin əməliyyatda iştirak edən amerikalı hərbçilər arasında əməlli başlı mübahisəyə səbəb olub.

Axar.az xəbər verir ki, bir müddət əvvəl Qərb mətbuatı bin Ladeni 38 yaşlı Rob Onil adlı xüsusi təyinatlının öldürdüyünü yazmışdı. Onun 2011-ci il mayın 2-də keçirilən əməliyyat zamanı bin Ladenə başından 3 dəfə atəş açdığına görə, mükafata layiq görüldüyü bildirilmişdi.

Bu məlumat əməliyyatda iştirak edən "dəniz pişikləri" arasında narazılığa səbəb olmuşdu. Onlardan biri "Röyters" agentliyinə bildirmişdi ki, bin Ladeni Onildən əvvəl otağa girən xüsusi təyinatlı vurub.

Onilin açıqlamaları həmçinin keçmiş xüsusi təyinatlı Mett Bizonettin yazdığı "Ağır gün" adlı kitabında da təsdiqini tapmır. Kitab 2012-ci ildə Mark Ouen imzası ilə nəşr olunmuşdu. Bizonett də öz həmkarının açıqlamalarını təsdiqləməmişdi.

Hazırda Bizonett özü gizli məlumat yaydığı üçün istintaqa cəlb olunub. Buna baxmayaraq, onun "Qəhrəmanlarsız: HDQ xüsusi təyinatlılarının təkamülü" kitabı nəşr olunacaq.