Rusiyanın Maqnitoqorsk şəhərində yaşayış binasında qaz sızması nəticəsində baş verən partlayışla bağlı məsuliyyəti İŞİD terror qruplaşması üzərinə götürüb.

Axar.az xəbər verir ki, bu barədə "SİTE İntelligence Group" informasiya yayıb.

Məlumata görə, İŞİD partlayışla bağlı məsuliyyəti üzərinə götürüb və binada partlayıcı quraşdırıldığını bildirib. Sözügedən informasiyanın 3 həftə sonra yayılması isə partlayışı törədən şəxsin təhlükəsizliyinin təmin edilməsi ilə əlaqələndirilib.

Qeyd edək ki, dekabrın 31-də yerli vaxtla saat 04 radələrində Maqnitoqorsk şəhərində yaşayış binasında qaz sızması nəticəsində baş verən partlayış nəticəsində 39 nəfər həlak olub.