Venesuelanın paytaxtı Karakasda hökumətə qarşı etiraz aksiyası keçirilib.

Axar.az xəbər verir ki, bu barədə məlumatı “Nacional” portalı yayıb. Məlumata görə, aksiya zamanı etirazçılarla hərbçilər arasında toqquşma yaşanıb. Paytaxtın Katia rayonunda Milli Qvardiyanın maşınlarına fərqli predmetlər atılıb. Karakasın müxtəlif rayonlarında barrikadalar hazırlanıb və Maduroya etirazı simvolizə edən qazan səsləri eşidilməyə başlanıb.

Hökumət artıq xüsusi təyinatlıları aksiyaların keçirildiyi bölgələrə toplamağa başlayıb. Polis etirazçılara qarşı gözyaşardıcı qaz tətbiq edib. Bəzi yerlərdə hətta etirazçılara qarşı odlu silahdan atəş açıldığı bildirilir. İddialara görə, 2 etirazçı həlak olub.

Bolivar ştatının San-Feliks şəhərindəki etirazçılar isə eks-prezident Uqo Çavesin heykəlini yandırıblar.

Qeyd edək ki, bu gecədən etibarən Venesuelada etiraz aksiyalarına start verilib. Etiraz aksiyalarına əhalini Venesuela parlamentinin spikeri Xuan Quaido çağırıb.

Bundan öncə Prezident maduroya qarşı bəzi hərbçilər qiyama cəhd etmişdilər.