Ermənistan-Rusiya əlaqələrindəki gərginlik bu iki ölkənin münasibətlərini əhəmiyyətli şəkildə poza bilər.

Axar.az xəbər verir ki, bu iddia ilə “Stratfor” şirkəti çıxış edib. Ermənistanı “Kremlin Qafqazdakı qalası” adlandıran şirkət Gümrüdə Rusiyanın 102-ci bazası olduğunu, Moskvanın Ermənistanın iqtisadi sektoruna güclü təzyiq göstərdiyini qeyd edib:

“Rusiya Ermənistanın həm də böyük ticarət tərəfdaşıdır. Ermənistanın ümumi ticarətinin 25%-i Moskvanın payına düşür. Ermənistanda son hakimiyyət dəyişikliyi tərəflər arasında baş verən möhkəm münasibətləri şübhə altına qoyub. İki ölkə arasında münasibətlərə xüsusilə eks-prezident Robert Köçəryan və KTMT-nin keçmiş baş katibi Yuri Xaçaturov barəsində başladılan cinayət işi güclü təsir göstərib”.

Şirkət həmçinin ABŞ Prezidentinin milli təhlükəsizlik üzrə müşaviri Con Boltonun oktyabrda Ermənistana səfəri və onun burada silah satışıyla bağlı verdiyi bəyanatın da Rusiya-Ermənistan münasibətlərinə təsir göstərdiyini iddia edib:

“Ermənistan-Rusiya tərəfdaşlığının digər sferaları, o cümlədən enerji sektorunda da fikir ayrılığı var. Fikir ayrılığı Ermənistan-Rusiya hərbi əlaqələrini də təhdid altında qoyur. Əgər iki ölkənin münasibətləri pisləşməyə davam etsə, digər qüvvələr, o cümlədən ABŞ, İran və Türkiyə Qafqaz ölkələrinə müdaxilə edə biləcək və Rusiyanın mövqeyini zəiflədəcək. Moskva və İrəvan arasında fikir ayrılığından istifadə edərək, digər ölkələr yaranmış gərginliyi daha da gücləndirə və ümumilikdə regiondakı mövqelərini yaxşılaşdıra bilərlər”.