Davos iqtisadi və siyasi anlamda çox mühüm forumlardan bəlkə də birincisidir. Çünki bu foruma kifayət qədər böyük media diqqəti olur.

Bu sözləri Axar.az-a açıqlamasında iqitsadçı ekspert Natiq Cəfərli deyib. O bildirib ki, Azərbaycan Davos forumu kimi platformalardan istifadə edərək, ölkəyə daha çox vəsaitin və investisiyanın cəlb olunmasına nail ola bilər:

“Bu günə qədər keçirilən görüşlər əsasən Azərbaycana ən azından xaricdən daha çox investisiya cəlb olunması, qlobal layihələrə daha çox maraq yaranması ilə bağlıdır. Doğrudur, hələ ki, konkret müqavilələr imzalanmayıb. Amma ən azından Azərbaycanın tanıtımı və Azərbaycana investisiyalar yatırmağın vacibliyi ilə bağlı görüşlərdə fikirlər səsləndirilib. Mənə elə gəlir ki, davamlı olaraq belə tanıtımların həyata keçirilməsi Azərbaycana investisiyaların cəlb olunması üçün olduqca vacibdir. Eyni zamanda, Azərbaycanın özündə investisiya məkanının daha da yaxşılaşdırılması, qanunvericiliyin təmin olunması üçün də bu cür forumlarda iştirak etmək mühüm əhəmiyyətə malikdir”.

Neft Araşdırmalar Mərkəzinin rəhbəri İlham Şaban isə qeyd edib ki, Azərbaycan karbohidrogenlərlə zəngin digər Xəzəryanı ölkələrdən fərqli olaraq, özünün neft gəlirlərini infrastruktura yönəltməklə, bunun nəticəsində dayanıqlı inkişafı təmin edə bilir.