"Türkiyə Qətərlə koalisiya yaradıb".

Axar.az xəbər verir ki, bu sözlər "Reqnum" agentliyinin Misir, Yunanıstan və Cənubi Kiprin Türkiyəyə qarşı yaratdığı koalisiya ilə bağlı hazırladığı analitik məqalədə yer alıb.

Agentlik Türkiyənin Misirlə münasibətləri pozulduqdan sonra Yaxın Şərqdən təcrid olunmağa başladığını bildirib. Qahirə Türkiyə səfirini persona non-qrata elan edəndən sonra Ankaraya qarşı təzyiqlər başlayıb. Bununla da Misirin yeni hakimiyyəti regionda özünü Türkiyəyə qarşı yeni qüvvə kimi göstərməyə çalışıb. Ankara isə bölgəyə təsir etmək imkanlarını əlində saxlamaqdan ötrü yeni bir dövlətlə - Qətərlə yaxınlaşmaq məcburiyyətində qalıb. Məhz bu koalisiya Misirin yaratdığı ittifaqa qarşı fəaliyyətə başlayıb. Agentlik Misirin yaratdığı ittifaqla Türkiyə ətrafında yeni geopolitik konflikt ocağının yarandığını, lakin bunun hərbi toqquşmaya gətirib çıxarmayacağını bildirib.

Qeyd edək ki, oktyabrın 29-da Misir, Cənubi Kipr və Yunanıstan Xarici İşlər nazirləri siyasi məsləhətləşmələr aparmaq üçün Cənubi Kiprdə bir araya gəliblər. Xarici İşlər nazirləri Türkiyənin Kipr sahilində təbii qaz fəaliyyətini bitirməyin lazım olduğunu qeyd edərək bu cür addımların özünə zərər verəcəyini vurğulayıblar. Cənubi Kiprin Xarici İşlər naziri Yohanis Kasulidis Yunanıstan və Misirlə əməkdaşlığın bölgədəki heç bir ölkənin əleyhinə olmadığını, əksinə, bölgədə sülh və sabitliyə yardım etdiyini bildirib