Bidzina İvanişvili “TBC Bank” və Anakliya limanını ələ keçirmək istəyir. O, bu məqsədinə Mamuka Xazaradze və Badri Caparidzedən bankı almadan çatmaq niyyətindədir. Bankın rəhbərliyi dəyişəndən sonra “TBC Bank”ı yaxın adamlarına verməyə çalışır. Məqsədinə çatmaq üçün isə Gürcüstan Milli Bankından istifadə edir.

Axar.az xəbər verir ki, bunu Gürcüstanın Beynəlxalq Ticarət Palatasının rəhbəri Fadi Asli deyib.

O, bu ittihamın təkcə şəxsi fikri olmadığını, fərqli beynəlxalq mənbələrin də belə düşündüyünü bildirib:

“İvanişvilinin yekun hədəfi Rusiya şirkətlərinin sanksiyalardan yayınmasına “TBC Bank” vasitəsilə yardım etməkdir. Anakliya limanına gəlincə, İvanişvili Xazaradze və Caparidzeyə ağır ittihamlar irəli sürərək, onların nüfuzuna zərbə vurmağa və bununla beynəlxalq donorları limanın tikintisini maliyyələşdirməsi fikrindən yayındırmağa çalışır. Onların layihənin maliyyələşdirilməsindən imtinası layihənin dayanması olacaq. Bundan sonra o, layihəni öz əlinə keçirəcək”.

Qeyd edək ki, Xazaradze İvanişvilidən sonra Gürcüstanın ikinci ən güclü şəxsi sayılır. Bir zamanlar İvanişvili ilə ortaq hərəkət edən Xazaradze Saakaşvilinin hakimiyyətdən göndərilməsində aparıcı şəxslərdən biri olub.