Qətər əmiri Təmim bin Həməd əs-Sani Avropa Birliyi ilə Ərəb Ölkələri Liqası arasında Misirdə baş tutacaq sammitə qatılmayacaq.

Axar.az xəbər verir ki, bu məlumatı “RİA Novosti” agentliyi yayıb. Məlumata görə, Sani görüşdə Qahirənin beynəlxalq protokol qaydalarını pozması ucbatından iştirak etməyəcək.

“Qətər Ərəb Ölkələri Liqası-Avropa Birliyi sammitinə dəvət edilib. Misir hakimiyyətinin dəvətdən öz məqsədlərinə çatmaq üçün istifadə etməsindən təəccüblənmirik. Misirin dəvətində yer alan dil və format beynəlxalq protokolu pozur”, - Qətər XİN-dəki mənbə bildirib.

Agentlik digər ərəb ölkələrindən fərqli olaraq, Qətərə göndərilən dəvətin ölkə əmirinin adına ünvanlanmadığını bildirib. Üstəlik, dəvət Qətərin Ərəb Ölkələri Liqasındakı Daimi Nümayəndəliyi yerinə Qətərin Yunanıstandakı Səfirliyinə göndərilib.

Qeyd edək ki, AB-Ərəb Ölkələri Liqası konfransı fevralın 24-də Şarm əş-Şeyx şəhərində start götürəcək.