Rusiyaya gələn miqrantların sayı 2005-ci ildə bu yana ən aşağı səviyyəyə çatıb.

Axar.az xəbər verir ki, bu barədə Rusiya Federal Statistika Xidməti məlumat yayıb.

Belə ki, keçən il ölkəyə gələn miqrantların sayı 124,9 min nəfər olub. 2017-ci illə müqayisədə 2018-ci ildə miqrasiya artımı 41% və ya 87 min nəfər azalıb.

Son 10 ildə ilk dəfə ölkəyə gələn miqrantların sayı təbii azalmanı kompensasiya edə bilməyib. Belə ki, keçən il ölkədəki əhalinin sayı 93,5 min nəfər azalıb.

2018-ci ildə Rusiyaya gələn xaricilərin sayı 4% azalıb, Rusiyadan gedənlərin sayı isə 17% artıb. Ötən il Rusiyaya ən çox miqrant Tacikistandan gəlib. Rusiyaya gələn hər dörd miqrantdan biri tacik olub. Tacikistandan sonrakı yerləri Qazaxıstan və Ukrayna tutub.

Qeyd edək ki, Rusiyaya 2014-ci ildən bu yana ən çox miqrant Ukraynadan daxil olub.