Ermənistana gələn iranlı turistlərin sayı kəskin şəkildə azalıb.

Axar.az xəbər verir ki, bu məlumatı “Joxovurd” qəzeti yayıb. Məlumata görə, 2017-ci illə müqayisədə keçən il Ermənistana gələn iranlı turistlərin sayı 44,3% azalıb.

İranlı turistlərin artıq Ermənistan əvəzinə daha sərfəli olan Gürcüstana üstünlük verdikləri bildirilib.

“Bununla belə, kəskin artımın Türkiyədən olan turistlərin sayında qeydə alındığı açıqlanıb. Bu ölkədən Ermənistana gələn turistlərin sayı 76,7% artıb. Doğrudur, bu faiz əslində böyük rəqəm kimi görünə bilər, amma əslində söhbət xeyli kiçik saydan gedir. Türkiyə ilə bərabər Rusiyadan Ermənistana gələnlərin sayı 20,5% artıb”, - məlumatda qeyd edilib.

Qeyd edək ki, bir müddət öncə İrana səfər edən Ermənistan Baş naziri Nikol Paşinyan iki ölkə arasında turizm sahəsində əlaqələrin yüksək inkişaf etdiyini və Ermənistana gələn iranlı turistlərin sayının artdığını demişdi.