Gürcüstan Ermənistana gedən rus qazının tranzit üçün tarifin artırılmasına nail olub.

Axar.az xəbər verir ki, bunu jurnalistlərə açıqlamasında Gürcüstan İqtisadiyyat nazirinin müavini Natiya Turnava deyib. O, Gürcüstan tərəfinin danışıqlarda iki əsas prinsipə – enerji müstəqilliyi və “Qazprom”la münasibətlərdə mövqeyin yaxşılaşdırılmasına əməl etdiyini bildirib.

Gürcüstan bundan sonra da Azərbaycan qazı alacağını deyib:

“Azərbaycan qaz sferasında əvvəlki kimi əsas tədarükçü və Gürcüstanın strateji tərəfdaşı olaraq qalır. “Şahdəniz” yatağının ikinci fazasının tam fəaliyyətə başlamasından sonra Azərbaycan qazının Gürcüstan bazarındakı payı daha da artacaq”.

O, həmçinin rus qazının tranzit qiymətinin artırıldığı, alış qiymətinin isə ucuzlaşdırıldığını deyib. Turnava bu ucuz qiymətlərin daha çox rus qazından alternativ variant kimi istifadə etməyə çalışacaq özəl biznesə aid ediləcəyini söyləyib.

Nazir müavini müqavilənin iki il müddətinə bağlanılacağını deyib.