Qazaxıstan Prezidenti Nursultan Nazarbayev və onun fransız həmkarı Fransua Olland Avropa Birliyi və Avrasiya İqtisadi İttifaqı arasında dialoqun təşkil edilməsi yollarını müzakirə ediblər, həmçinin Ukraynadakı böhranın həllində kompromis yol tapılmasının mümkünlüyünə əminliklərini bildiriblər.

Axar.az RİA Novostiyə istinadla bildirir ki, Nazarbayev jurnalistlərə müsahibəsində bu barədə qeyd edib:
"Bir sıra aktual məsələlərdə Fransanın bizimlə əməkdaşlığı dəstəkləməsinə dair mühüm razılaşmalar əldə edilib, Avropa Birliyi və Avrasiya İqtisadi İttifaqı arasında dialoqun təşkil edilməsi imkanları nəzərdən keçirilib".
"Biz həmçinin Ukrayna böhranının nizamlanmasına dair yanaşmaları da gözdən keçirdik. Burada Prezident Fransua Ollandla mövqelərimiz eynidir. Biz bu heç kimə xeyri olmayan, beynəlxalq münasibətləri korlayan, yalnız Avropa və Asiyanın deyil, bütövlükdə bütün dünya iqtisadiyyatına mənfi təsir göstərən bu böhranın aradan qaldırılması üçün təmas nöqtələrinin tapılmasını istəyərdik", - deyə Nazarbayev əlavə edib.
İki ölkə liderləri, bundan əlavə, Yaxın Şərqdəki vəziyyəti və Qərbin Rusiya əleyhinə sanksiyalarını da müzakirə ediblər.

Xatırladaq ki, Fransua Olland dekabrın 5-də Qazaxıstana rəsmi səfər edib. Akordda (Qazaxıstan prezidentinin iqamətgahı) dövlət başçılarının qapalı və geniş tərkibdə danışıqları baş tutub.