1915-ci il dekabrın 20-də anadan olan türkiyəli yazar Əziz Nesin yaşasaydı, 2015-ci ildə 100 yaşını qeyd edəcəkdi. Ancaq 1995-ci il iyulun 6-da vəfat edən yazarın dostları onu heç vaxt yaddan çıxartmayıb.

Axar.az xəbər verir ki, Nesin Fondu 2015-ci ili Əziz Nesin ili elan edib.

Məşhur yumoristik hekayə yazarının 100 yaşı il ərzində müxtəlif tədbirlərlə qeyd olunacaq. Tədbirlər dekabrın 15-də Fulya Sənət Mərkəzində "Zübük" hekayəsi əsasında səhnələşdirilən musiqili tamaşanın səhnəyə qoyulması ilə başlayacaq.

İyun ayında isə Topxanada Tütün anbarında Əziz Nesin sərgisi təşkil olunacaq. Sərgidə Əziz Nesinin 1993-cü ildə Sivas şəhərində təşkil edilmiş ədəbiyyatla bağlı tədbirdə Madımak otelinin yandırılması nəticəsində 33 ziyalının öldüyü faciə vaxtı əynində olan və xəstəxanada əynindən kəsilərək çıxarılan köynəyi, orada əyninə geydirilən ağ xalat da nümayiş etdiriləcək.

Əziz Nesinin ölməzdən əvvəl son dəfə geydiyi paltarlar, "Beyinimin fotosunu gördüm, çox bəyəndim", dediyi beyin tomoqrafiyası, 1956-cı ildə aldığı yazı makinası da sərgilənəcək.