"SSRİ-ni saxlamağın yeganə yolu təkpartiyalı sistemlə çox sərt şəkildə idarə edilməsi üsulu idi. Uzun müddət SSRİ-də bu metoddan istifadə edildi. Heç bir fərqli səsə imkan verilmədi. Lakin bu üsul dayandırıldığı zaman SSRİ də dağıldı".

Axar.az xəbər verir ki, bunu "Əlcəzirə" kanalına müsahibəsində Ukraynanın ilk prezidenti Leonid Kravçuk deyib. O, Sovetlər Birliyinə son verən müqaviləni imzalama nöqtəsinə necə gəldiklərini açıqlayıb:

"SSRİ-yə son qoymaq fikri Qorbaçovun bizi topladığı Moskva yaxınlarındakı Novoqaryevoda gündəmə gəldi. Yığıncağa ara verildiyi an Yeltsin, Şuşkeviç və Nazarbayevlə birlikdə bağa çıxdıq. Həmin an bu sistemin Qorbaçovla davam etməyəcəyini anladıq və gizli görüşüb məsələni həll etməyi planlaşdırdıq. Əvvəlcə Moskvada görüşmək təklif edildi. Lakin Yeltsin Moskvada KQB-nin nəzarətində olacağımızı deyərək bizi bu fikirdən yayındırdı. Daha sonra Şuşkeviçin təklifi ilə Belovejskdə görüşməyə qərar verdik. Təxminən beş saat davam edən görüşdə SSRİ-nin varlığına son qoyan müqavilə imzaladıq. Müqavilənin ən əhəmiyyətli hissəsi SSRİ-nin beynəlxalq subyekt kimi varlığına son qoyulması ifadəsi idi. Bununla da bir dövr bağlanmış oldu".