Rusiya Federasiyası ilə Türkiyə arasında S-400 zenit raket komplekslərinin çatdırılması ilə bağlı müqavilə gecikmə olmadan həyata keçirilir.

Axar.az xəbər verir ki, bu sözləri Türkiyənin Xarici İşlər naziri Mövlud Çavuşoğlu deyib.

“Müddətin dəyişdirilməsi ilə bağlı heç bir məsələ yoxdur. Bu bitmiş müqavilədir, nə üçün dəyişdirilməsi və ya dayandırılması barədə danışaq? Bu məsələ gündəmdə deyil. Biz işçi qrup çərçivəsində ABŞ-la çalışmağa başlamaq istəyirik. ABŞ-ın narahatlığını aradan qaldırmaq üçün mütəxəssislər çalışsın. Bu mənada ABŞ-la əlaqələrimiz davam edir. Hələlik heç bir şey müəyyən edilməyib, ancaq biz məsələyə konstruktiv yanaşırıq”, - Çavuşoğlu bildirib.

Qeyd edək ki, ötən gün “Blumberq” agentliyi Türkiyənin S-400 tədarükünü 2020-ci ilə qədər təxirə saldığı barədə məlumat yaymışdı.