Şimali Koreyada hərbi çevriliş imkanları məhduddur.

Axar.az xəbər verir ki, bunu Tokioda jurnalistlərə açıqlamasında 2016-cı ildə ailəsi ilə Cənubi Koreyaya qaçan keçmiş yüksək vəzifəli Şimali Koreya diplomatı Txe Yon Xo deyib.

“Ölkənin hazırkı müdafiə strukturunda hansısa çevrilişə və ya liderin hərbçilər tərəfindən uzaqlaşdırılmasına heç bir imkan yaradılmayıb. Ölkənin unikal hərbi strukturu var və o, müharibə üçün uyğunlaşdırılmayıb. Baş Qərargah silahsızlandırılmış zonada yalnız 600 hərbçiyə nəzarət edə bilər. Şimali Koreya hərbçilərinin heç bir silahı yoxdur, Pxenyanı mühafizə edən hərbçilər isə Şimali Koreya Müdafiə Nazirliyinə tabe deyil. Hərbçilərdən heç kim çevriliş təşkil edə bilməz və yalnız Kim Çen İn ordunun fərqli sektorlarını nəzarətdə saxlaya bilir. Bu ölkədəki rejim daha 10-20 il davam edəcək, amma onun çöküşü qaçılmazdır”, – deyə o bildirib.

Qeyd edək ki, Txe Yon Xo Şimali Koreyanın Londondakı Səfirliyində müşavir olaraq çalışıb.