Gürcüstan əhalisinin əsas problemi işsizlikdir.

Axar.az xəbər verir ki, bu nəticə Beynəlxalq Respublikaçılar İnstitutunun keçirdiyi sorğudan sonra ortaya çıxıb. Sorğuya əsasən, bu fikri əhalinin 73%-i dəstəkləyib. Gürcülərin 40%-i son bir il ərzində maliyyə vəziyyətlərinin dəyişmədiyini, 49%-i isə daha da pisləşdiyini bildirib.

Gürcülərin 1%-i hələ də Rusiya aqressiyasının ölkələrinə qarşı davam etdiyinə inandıqlarını deyib. 17% bu aqressiyanın bitdiyini, amma hər an yenilənə biləcəyini, 5% aqressiyanın yenilənməsi təhdidinə inanmadığını söyləyib. Bununla belə, 46% Rusiya ilə dialoqun aparılmasını dəstəklədiyini vurğulayıb. Moskva ilə bütün əlaqələrin tam kəsilməsinə ümumilikdə 12% respondent tərəfdar olub.

Yeni sorğuda Rusiya əvvəlki kimi Gürcüstana qarşı siyasi və iqtisadi təhdid yaradan ölkə seçilib. Rusiyanı siyasi təhdid kimi respondentlərin 79%-i, iqtisadi təhdid kimi isə 57%-i gördüyünü bildirib. Rusiyadan sonrakı yerlərdə Türkiyə 11% və 7%-lə, Azərbaycan 6% və 4%-lə qərarlaşıb.

Gürcüstan ən vacib siyasi tərəfdaş kimi gürcülər ABŞ-ı gördüklərini bildiriblər. Respondentlərin 50%-i bu fikri dəstəkləyib. Ondan sonrakı yerdə AB (47%)və Ukrayna (29%) qərarlaşıb. Siyahıda sonrakı yerdə Azərbaycan (9%), Türkiyə (8%) və Ermənistan (7%) dayanıb. Cəmi 5% respondent Rusiyanın ölkələrinin vacib siyasi tərəfdaşı ola biləcəyini bildirib.

İqtisadi tərəfdaşlıq məsələsinə gəlincə isə burada 39%-lə Avropa Birliyi liderlik edib. Onu ABŞ (33%) və Türkiyə (19%) izləyib. Rusiyanı vacib iqtisadi tərəfdaş olaraq respondentlərin cəmi 7%-i dəstəkləyib. Azərbaycan isə siyahıda Ukraynadan sonra beşinci yeri (13%) tutub.

Gürcüstanın münasibətlərinin yaxşı olduğu ölkələr sırasına gürcülərə görə, Ukrayna (90%) başçılıq edir. Ondan sonrakı yerlərdə isə ABŞ (87%), AB (87%), Türkiyə (72%), Ermənistan (66%), Çin (58%), Azərbaycan (56%) və İran (45%) dayanıb.

Gürcülər həmçinin ölkədə ən çox kilsəyə (89%) və orduya (87%) güvəndiklərini deyiblər. Siyahıda sonrakı yerləri KİV (70%), polis (52%), yerli hakimiyyət orqanları (48%), təhsil sistemi (40%), parlament (37%), Nazirlər Kabineti (34%), MSK (34%), baş nazir (33%), prezident (33%), qubernatorlar (27%), siyasi partiyalar (26%), prokurorluq (25%), Mərkəzi Bank (25%), məhkəmələr (23%), həmkarlar ittifaqları (18%) bölüşüb.