Anakliya limanının tikintisinin dayandırılması Gürcüstan üçün faciə olacaq.

Axar.az xəbər verir ki, bunu İVPR-ə müsahibəsində ABŞ-ın Azərbaycandakı keçmiş səfiri Metyu Brayza deyib.

“Anakliya strateji limanı Gürcüstan üçün oyun qaydalarını dəyişir. O, bütün dünyadan irimiqyaslı daşımalar üçün qapı açır. Liman Rusiyanın Gürcüstana təsir cəhdini yox edəcək. Buna görə də Rusiya bu layihəyə nifrət edir”, – deyə o bildirib.

Brayza Rusiyanın Anakliya layihəsinin dayandırılması üçün hərbi gücdən istifadə etməyəcəyini deyib. Eks-səfir bu limanın Gürcüstanın avroatlantik inteqrasiyası üçün də böyük əhəmiyyət kəsb edəcəyini bildirib:

“Bu, NATO-nun perspektivinə böyük təsir göstərəcək. Liman Əfqanıstana hərbi-texniki tranzit üçün də istifadə ediləcək. Ən vacib isə odur ki, ciddi gərginlik yaranacağı halda Anakliya vasitəsilə Gürcüstana dəstək veriləcək”.

Brayza 2008-ci il müharibəsi zamanı Poti limanının imkanlarının aşağı olması ucbatından Rusiyaya Qərb tərəfindən dəqiq siqnal göndərilə bilmədiyini söyləyib.