Şimal axını-2 qaz kəməri layihəsi bütün Avropa üçün təhlükə yaradır.

Axar.az xəbər verir ki, bunu Ukrayna Prezidenti Vladimir Zelenski deyib. Sözügedən layihənin Avropa ölkələri üçün qəbuledilməz olduğunu bildirən Zelenski bununla yanaşı, təbii qaz tədarükünün şaxələndirilməsinin vacibliyini vurğulayıb.

Polşa Prezidenti Andjey Duda ilə görüşən Zelenski Kiyev və Varşavanın Şimal axını-2 layihəsi ilə bağlı eyni fikirdə olduğunu da qeyd edib. O, həmçinin, bildirib ki, Ukrayna-Polşa-ABŞ üçbucağı çərçivəsində enerji müttəfiqliyinin tərəfdarıdır.

Rusiyalı senator Aleksey Puşkov isə Zelensikinin bu açıqlamasına Tvitter hesabında cavab verib.

O, Ukrayna və Polşa prezidentinin öz cibləri üçün narahatlıq keçirdiyini qeyd edib:

"Zelenski və Duda bir fit çalırlar, amma əslində Şimal axını-2 Avropa üçün təhdid deyil. Kiyev Rusiya qazı tranzitindən gələn pulu itirməkdən qorxur, Varşava isə ABŞ-dan aldığı bahalı maye qazı qonşularına satmağı xəyal edir. Bütün təhdidlər yalnız onların ciblərinədir. Avropanın bununla əlaqəsi yoxdur".