Honkonqda etirazçılar bütün tələblərinin yerinə yetirilməsi ilə bağlı aksiyaları davam etdirir.

Axar.az xəbər verir ki, bu barədə məlumatı "Anadolu" agentliyi yayıb. Məlumata görə, rəsmilər Honkonq Beynəlxalq Hava Limanında aksiya keçirmək istəyən nümayişçilərin cəhdlərinin qarşısını limana gedən yollarda nəzarəti gücləndirməklə alıb.

Polislər hava limanına gedən avtobusdakı sərnişinlərin çantasından maska tapıldığı üçün onları həbs edib. Bundan başqa, liman istiqamətində hərəkət edən sürət qatarlarının reysləri azaldılıb və yalnız bir dayanacaqdan sərnişin götürülməsinə icazə verilib. Həmçinin yalnız uçuş bileti olanların qatara minməsi barədə tapşırıq verilib.

Agentlik onu da qeyd edib ki, etirazçıların hava limanındakı aksiya planı baş tutmadığı üçün onlar şəhərdəki bütün ticarət mərkəzlərində, dəmiryolu operatoruna məxsus stansiyalarda və polis bölmələrinin qarşısında aksiya keçiriblər.