Ukraynada əcnəbi avtomobillər üçün yollardan istifadəyə görə ödəniş tətbiq edilməsi planlaşdırılır.

Axar.az Azərtac-a istinadən xəbər verir ki, Ukraynanın İnfrastruktur naziri Vladislav Krikli bu məlumatı Nikolayev şəhərində keçirilən müşavirədə açıqlayıb.

Nazir deyib: “Biz Ukrayna yollarında əcnəbilər üçün gediş-gəlişin pullu olmasını planlaşdırırıq, çünki onlar heç də həmişə aksiz almır və aksiz haqqı ödəyən bizim sürücülərə münasibətdə ədalətsizlik yaranır. Məsələn, xarici nömrə nişanlı, yanacaq çəni dolu olan böyük TIR Ukraynaya gəlir, bizim yollarda bir neçə min kilometr məsafə qət edir və buna görə heç nə ödəmir. Bu səbəbdən müəyyən mexanizm hazırlamağı planlaşdırırıq və ümidvarıq ki, deputatlar bu təklifi dəstəkləyəcəklər”.

V.Krikli qeyd edib ki, gələn il Ukrayna yolları üçün dövlət büdcəsindən əlavə vəsait alınması planlaşdırılır.

Nazir vurğulayıb: “Biz qarşıya ambisiyalı bir hədəf qoymuşuq – beş il ərzində 24000 kilometr yol təmir edilməlidir. Bu hədəfə çatmaq istəyiriksə, yol fondundan əlavə ümumi fonddan da vəsait alımalıyıq. Bunun üçün müvafiq resurslar var”.