Növbəti ilin aprel ayında Çilidə keçmiş diktator Avqusto Pinoçetin dövrünə aid Konstitusiyanı dəyişdirmək üçün referendum keçiriləcək.

Axar.az xəbər verir ki, Çilidə davam edən etiraz aksiyaları hökuməti belə bir addım atmağa vadar edib. Referendumda Çili xalqı Konstitusiyanın dəyişdirilməsinə səs verərsə, yenisini yazmaq üçün heyət formalaşdırılacaq. Yeni Konstitusiyanı yazmaq üçün heyət də xalq tərəfindən seçiləcək.

Məsələ ilə bağlı danışan Çili Senatının sədri Xayme Quintana müxalifət və hökumət arasında görüşdə razılığın əldə edildiyini və bunun bütün ölkə üçün bir qələbə olduğunu bəyan edib:

"Çili üçün tarixi bir gündür. Təxminən 30 ildir ki, Konstitusiyanı dəyişdirməyə dəfələrlə cəhd edilib. İnsanlar bunu etdi, bu, bütün ölkə üçün bir qələbədir".