Türkiyənin təhlükəsizlik orqanları bu ilin yanvar-oktyabrında bütovlükdə ölkə üzrə 109423 antiterror əməliyyatı keçirib.

Report xəbər verir ki, ölkənin müxtəlif əyalətlərində jandarm qüvvələrinin və aviasiyanın köməyi ilə "Kıran" əməliyyatının bütövlükdə altı mərhələsi keçirilib. Əməliyyatlar çətinliklə gedilə bilən dağlıq ərazilərdə terrorçuların qış bazalarını formalaşdırmasının qarşısını alıb.

Daxili İşlər Nazirliyinin məlumatına görə, əgər 2018-ci il ərzində ümumilikdə ölkə üzrə 97377 əməliyyat keçirilmişdisə, cari ilin yalnız 10 ayında bu göstərici demək olar, 110 minə çatıb.

Bu ilin yanvar-oktyabr aylarında Türkiyədə 457 terrorçu zərərsizləşdirilib, daha 257 nəfər yaxalanıb. Polis və jandarmeriya 11380-dən çox terrorçunu və onların əlaltısını saxlayıb.

Qeyd edək ki, Türkiyə Müdafiə Nazirliyi 4 min İŞİD döyüşçüsünün məhv edildiyini açıqlamışdı.