Çin ilə ticarət anlaşmamız çox yaxşı gedir, ancaq Honkonqda da işlərin yaxşı getdiyini görmək istəyirik. Düşünürəm ki, yaxşı olacaq.

Axar.az xəbər verir ki, bu açıqlama ilə ABŞ Prezidenti Donald Tramp çıxış edib.

Çin Sədri Si Szinpinlə münasibətlərindən danışan Tramp əlaqələrin yaxşı olduğunu və həmkarının Honkonqdakı hadisələri yoluna qoymaq üçün əlindən gələni edəcəyini bildirib.

Qeyd edək ki, cinayətkarların Çinin materik hissəsinə ekstradisiya olunması barədə qanun layihəsinin hakimiyyət tərəfindən qəbul edilməsi cəhdindən sonra Honkonqda kütləvi etiraz aksiyaları başlayıb. Şəhər hökumətinin sentyabrda həmin təşəbbüsdən imtina etməsinə baxmayaraq, aksiyalar hələ də davam edir.

Etirazlar istirahət və bayram günləri daha da aktivləşir və zamanla iğtişaşlar, küçələrin bağlanması, yanğın törədilməsi halları və metro stansiyalarında vandalizm aktları ilə müşayiət olunur.