Macarıstana səfər edən Almaniya kansleri Angela Merkeli öncə etirazçılar qarşılayıb.

Axar.az xəbər verir ki, ölkədə aylardır davam edən etiraz aksiyaları Merkelin paytaxt Budapeştə gəlişi zamanı daha da gərginləşib.

Etiraz nümayişinin təşkilatçılarından olan Bori Takacs etdiyi çıxışda hökumətin şərq ölkələri ilə inkişaf etdirdiyi əlaqələri pisləyərək, macarların azad Avropa vətəndaşı olduğunu deyib.

Macar xalqına siyasi təzyiq edildiyini iddia edən Takacs iqtidarın 2010-ci ildən bəri anti-demokratik siyasət yürütdüyünü, xalqın maraqlarının tapdandığını bildirib.

Mitinq həm də ölkənin sayılıb-seçilən ictimai-siyasi, mədəni simalarının iştirakı ilə də yadda qalıb. Almaniyalı yazar Hans-Henninq çıxışında mitinq iştirakçılarını ölkəni oyandırmağa çağırıb:

"Macarıstanda demokratik sistem dəyişdirilir. Buna baxmayaraq, macar müxalifəti hazırda parçalanıb. Nə qədər ki, bu ölkə xaosa sürüklənməyib, oyanın".