Almaniya kansleri Angela Merkel və Macarıstanın Baş naziri Viktor Orban ölkələrinin Ukraynanı silahla təchiz etmək imkanını istisna ediblər. Onlar bu barədə Budapeştdə keçirilən birgə mətbuat konfransında bəyanat veriblər.

AzərTAc xəbər verir ki, alman hökumətinin başçısı deyib: "Biz Ukraynanı silahla dəstəkləməyəcəyik". Macarıstanın Baş nazirini cavabı da çox kəsə olub: "Sualınıza təkcə bir sözlə cavab verəcəyəm: yox".

A.Merkelin sözlərinə görə o, "qəti əmindir ki, mövcud münaqişəni hərbi yolla həll etmək olmaz". Buna görə də kansler əlavə edib ki, Avropa İttifaqı bir tərəfdən sanksiyalar siyasətinə, digər tərəfdən isə böhranın diplomatik yolla nizama salınmasına ümid edir.

AFR və Macarıstanın liderləri Ukraynanın şərqində atəşkəs rejiminin "olduqca tez" bərqərar olmasının vacibliyini qeyd ediblər. A.Merkel vurğulayıb ki, "Ukraynanın ərazi bütövlüyünün təmin ediləcəyi stabil vəziyyətə nail olmaqda" Minsk razılaşmasının başlanğıc nöqtəsi olması barədə Berlin və Budapeştin mövqeləri eynidir.

"Almaniya gələcəkdə də buna səy göstərəcək" - deyə kansler diqqəti Ukrayna və Rusiya arasında münaqişə məsələsində Aİ-nin vahid mövqe tutmasının vacibliyinə yönəldib. Qeyd edib ki, "Avropanın gücü bizim yekdilliyimizdədir".