Bu gün dünya şöhrətli azərbaycanlı alim Lütfi Zadənin 94 yaşı tamam olur.

Axar.az məlumat verir ki, ona daha çox şöhrət qazandıran banisi olduğu, dünya elmində inqilab hesab olunan qeyri-səlis məntiq nəzəriyyəsidir. 1965-ci ildən işlənib hazırlanan bu nəzəriyyədən dünyanın bir çox aparıcı şirkətləri bəhrələniblər. Lütfi Zadə Kaliforniya Berkli Universitetinin professorudur. O, bu ali təhsil müəssisəsinin ömürlük professoru seçilmiş yeganə şəxsdir. Kaliforniyanın Berkli şəhərində "İnformasiya Texnologiyaları üzrə Zadə İnstitutu" yaradılıb.

Müəllifi və yaradıcısı olduğu 6 mühüm nəzəriyyə dünya elminə inanılmaz töhfələr bəxş edib. O, bir çox xarici ölkə akademiyalarının üzvüdür. Çoxlu sayda mötəbər cəmiyyətlərin və fondların mükafatlarına layiq görülüb və medallarla təltif edilib. Prezident İlham Əliyev elm və texnologiyaların inkişafına verdiyi töhfələrlə mədəniyyətlərarası dialoqun qurulmasında göstərdiyi görkəmli xidmətlərə görə onu "Dostluq" ordeni ilə təltif edib.

Lütfi Zadə dünyada əsərlərinə ən çox istinad edilən alimlərdən sayılır. Təkcə 1990-2000-ci illərdə onun əsərlərinə 36000-dən çox istinad edilib.