Avropa Birliyi üzvü olan dövlətlər Ukrayna barəsində həmrəylik nümayiş etdirməlidir. Rusiyanın ağılsız müharibəni dayandırması üçün bu səylər davamlı olmalıdır.

Axar.az xəbər verir ki, bunu Ukrayna Prezidenti Pyotr Poroşenko alman mətbuatına verdiyi müsahibəsində deyib.

"Qondarma Donetsk və Luqansk Respublikaları müstəqil döyüş hissələri deyil. Onlar Moskvanın hərbi və maliyyə yardımı olmadan hərəkət edə bilməzlər. Hətta rus hərbçiləri Ukraynada başqa forma geyinsələr belə, onların şəxsiyyətini dəyişdirmək mümkün deyil. Rus hərbçilərinin Donbasda döyüşmələri ilə bağlı əlimizdə çoxlu faktlar var. Bunu dayandırmaq lazımdır", - Poroşenko bildirib.

Prezidentin sözlərinə görə, hazırda Donbasda 5-9 min arası rus hərbçisi və çoxlu sayda hərbi texnikası vuruşur:

"ABŞ və NATO-da bunu təsdiq edir. Separatçıların formasını geyinən rus hərbçiləri ikinci sırada döyüşür. Hər gün rus qoşunlarının döyüşmələri ilə bağlı faktlar əldə edirik. Döyüşlər nəticəsində Ukrayna hərbçiləri separatçıların Rusiyada istehsal olunmuş tank, reaktiv yaylım atəş sistemləri və artilleriyasını məhv edir. Biz Rusiya ilə yüzlərlə kilometr sərhədə nəzarət edə bilmirik".