İsveçli gənc fəal, iqlim müdafiəçisi Qreta Tunberq ABŞ-ın “Tayms” dərgisi tərəfindən “İlin adamı - 2019” tituluna layiq görülüb.

Axar.az xəbər verir ki, məlumat NBC telekanalının “Today” proqramının efirində səslənib.

“İqlim dəyişikliyi ilə mübarizə aparan yeniyetmə fəal Qreta Tunberq “İlin adamı-2019” elan olunub. Beləliklə, Tunberq 92 illik tarix ərzində bu ada layiq görülən ən gənc şəxs olub”, - deyə “Tayms” dərgisinin redaktoru bildirib.

Qeyd edək ki, “Tayms” dərgisinin redaksiyası adəti üzrə dekabr ayında “İlin adamı”nı elan edir və onun rəsmini dərginin üz qabığında yerləşdirir. Bu ada il ərzində ictimaiyyətə pozitiv və ya neqativ baxımdan daha çox təsir göstərən şəxs layiq görülür.