Bakı Dövlət Universitetinin mətbuat xidməti ötən gün tələbələrin imzası ilə redaksiyalara göndərilən və Hüquq fakültəsinin müəllimi Sərvər Süleymanlının işdən azad olunmasına hazırlıq görüldüyü barədə narahatlığı əks etdirən məsələyə reaksiya verib.

BDU-dan Axar.az-ın elektron ünvanına göndərilən açıqlamada bildirilir:

"Bəzi saytlarda Bakı Dövlət Universitetinin Hüquq fakültəsinin 0,5 ştat müəllimi, hüquq üzrə fəlsəfə doktoru, dosent Sərvər Süleymanlının işdən azad edilməsi haqqında hazırlıq işlərinin aparılması barədə məlumat yayılıb. Aydınlıq üçün bildiririk ki, dosent S.Süleymanlı bir neçə ay bundan əvvəl öz xahişi ilə dekan müavini vəzifəsindən azad edilib. Son günlər onun tədrisin təşkili qaydalarından kənar dərs aparması ilə bağlı tələbələrdən çoxsaylı ərizə və şikayətlər daxil olub. Buna baxmayaraq, onun işdən azad edilməsi üçün hazırlıq işlərinin aparılması həqiqətə uyğun deyil.

Sadəcə olaraq tələbələrin müraciəti Bakı Dövlət Universitetinin Tədris Metodiki Şurasında araşdırılır. Bu məsələ rektorluqda müzakirə olunmayıb və Sərvər Süleymanlı ilə bağlı hər hansı qərar yoxdur. Sərvər Süleymanlı hazırda hüquq fakültəsində elmi-pedaqoji fəaliyyətini davam etdirir".

Xatırladaq ki, ötən gün BDU-nun çoxsaylı tələbələrinin imzası ilə mediaya məktub ünvanlanmışdı. Məktubda yüksək səviyyəli pedaqoq, müəllim adını uca tutan və şəffaf fəaliyyəti ilə hamının rəğbətini qazandığı bildirilən S.Süleymanlıya qarşı fakültə dekanlığı tərədindən ədalətsizlik edildiyi, onun işdən uzaqlaşdırılması üçün tələbələrdən bəzilərinə məcburi ərizə yazdırıldığı qeyd olunurdu:

"Hazırda xüsusi "Sabah" qrupunda olan tələbələri məcbur edir, onun əleyhinə ifadə alır, guya Sərvər müəllimin tədrisini istəmədikləri yönündə ərizələrə imza atmalarını tələb edirlər. Bu işə canfəşanlıq edən isə imtahan öncəsi Sərvər müəllimə zəng edən və ondan oğluna yuxarı qiymət yazılmasını xahiş edən, ona imkanının yaxşı olmasını və müəllim olaraq ona köməyinin dəyəcəyini vəd edən bir valideyndir. Hələ adını açıqlamaq istəmədiyimiz bu valideyninin canfəşanlığı Hüquq fakültəsinin dekanatlığına Sərvər müəllimi işdən uzaqlaşdırmaq üçün bəhanə olmuşdur".

Tələbələri Sərvər Süleymanlını ləkələməyin mümkünsüz olduğunu yazmışdılar:

"Onu başqa adla ləkələmək mümkün deyil. Rüşvət almır, tapşırığa qulaq asmır... Tələbələrə daha çox nəzəri biliklərlə bərabər dərsləri "case"lər üzərində quran müəllimə başqa necə şər atmaq olar?!"

Sonda tələbələr BDU-unu rektorluğuna üz tutur və media vasitəsilə rektorluqdan yardım istəyirdilər:

"İnanırıq ki, bu məsələ rektorluq tərəfindən obyektiv qiymətlədiriləcək, haqq-ədalət öz yerini tapacaq".