İtaliyanın Lampedusa adası yaxınlığında 105 nəfəri daşıyan gəmidəki qaçaqlar soyuqdan donaraq ölüb.

Axar.az İtalyan mətbuatına istinadən xəbər verir ki, dünən gecə sahil təhlükəsizlik dəstələri Aralıq dənizində Lampedusa adasının 110 mil yaxınlığında insan qaçaqçılığında istifadə edilən əsas dəhlizlərdən biri olan Siciliya Kanalı adlandırılan bölgədə 105 nəfəri daşıyan gəmiyə xilasetmə əməliyyatı təşkil edib.

Qruplar əməliyyat əsnasında çətin vəziyyətdə olan immiqrantlarla birlikdə bədən temperaturlarının həddindən artıq düşməsi (hipotermiya) üzündən ölən 7 immiqrantın cəsədini gəmidən çıxarıb. Xilas edilən immiqrantların 18-i də Lampedusaya aparılarkən hipotermiya üzündən yolda həlak olub.

Xəbərlərdə qaçaq gəmisindən dünən günortadan sonra Romadakı sahil təhlükəsizlik komandirliyinə peyk telefonu vasitəsi ilə yardım müraciəti edildiyi, xilasetmə əməliyyatının bundan sonra başladıldığı bildirilib.