Ukrayna böhranının həlli istiqamətində Rusiya, Ukrayna, ATƏT nümayəndələri ilə Donetsk və Luqanskın separatçı nümayəndələri arasında Minskdə keçirilən görüşdə razılıq əldə olunub.

Axar.az xəbər verir ki, Təmas qrupu danışıqlarında atəşkəsin təmin edilməsi və ağır silahların məskunlaşma ərazilərindən çıxarılması mövzusunda razılıq əldə edib.

Təmas qrupunun iclasında Moskvanı Kiyevdəki səfir Mixail Zurabov, Ukraynanı isə qeyri-hökumət lideri Viktor Medvedçuk və keçmiş prezident Leonid Kuçma təmsil edib. Separatçı bölgələrdən isə danışıqlara Denis Puşilin və Vladislav Deyneqo, ATƏT tərəfdən isə xüsusi nümayəndə Heydi Talyavini qatılıb.

Xatırladaq ki, bu gün Rusiya Prezidenti Vladimir Putin, Ukrayna Prezidenti Pyotr Poroşenko, Almaniya Kansleri Angela Merkel və Fransa dövlət başçısı Fransua Ollandın iştirakı ilə Minskdə yekun danışıqlar başlayacaq.

Analitiklər bu görüşü son bir neçə ilin ən vacib görüşü olmaqla bərabər, sülhün təmin olunmasında son şans kimi qiymətləndirir.