Suriya və İraqda terror dalğasına fasilə verməyən İŞİD-ə xarici ölkələrdən döyüşçülərin qatılması davam edir.

Axar.az Türkiyə mətbuatına istinadən xəbər verir ki, Avstriya, Almaniya və İngiltərə başda olmaqla Avropa ölkələrinin bir çoxundan terror təşkilatına qatılanların sayı açıqlanıb.

ABŞ kəşfiyyatı təşkilatdakı xarici üzvlərin sayının 20 minə çatdığını bildirib.

Bundan əlavə, 150 nəfərə yaxın ABŞ vətəndaşının Suriyaya getdiyi, onlardan bəzilərinin döyüşlərdə öldüyü açıqlanıb. ABŞ kəşfiyyatından olan məsul şəxslər Suriyaya gedən xarici vətəndaşların son 20 ildə Əfqanıstan, Pakistan, İraq, Yəmən və Somaliyə gedən şəxslərdən daha çox olduğunu bildirib. Kəşfiyyat nümayəndələri həmin insanların öz ölkələrinə qayıtdıqdan sonra hər hansı terror aktı törətməsindən də narahat olduqlarını dilə gətirib.

Qeyd edək ki, Barak Obama ABŞ ordusuna İŞİD-ə qarşı üç il müddətində hərbi güc istifadə etmə səlahiyyəti verilməsi üçün qanun layihəsi hazırlayıb. Layihənin yaxın günlərdə Konqresə təqdim olunacağı gözlənilir.