Rusiyadan Ermənistana ucuz un idxalı ölkə daxilindəki istehsalçılara ağır zərbə vurub.

Axar.az xəbər verir ki, rublun məzənnəsinin kəskin şəkildə düşməsi Rusiyadan Ermənistana idxal edilən malların ucuz başa gəlməsinə səbəb olub. Yerli istehsalçılar artıq daxili bazarın itirilməsindən və idxal edilən ucuz unun keyfiyyətindən şikayətlənirlər.

Rusiyadan ucuz qiymətə un idxalı yerli şirkətlər üçün daha sərfəli hala çevrilib və nəticədə yerli fermerlərin məhsulları ortada qalıb.

Ermənistanın İqtisadiyyat Nazirliyinin nümayəndəsi Armen Yeqanyan daxili bazarda yerli istehsalçıları qorumaq üçün müəyyən məhsulların idxalını məhdudlaşdıra biləcəklərini açıqlayıb.

Qeyd edək ki, artıq AİB-in üzvü Qazaxıstan yerli bazarı qorumaq üçün Rusiyadan müəyyən malların idxalına tam və ya qismən qadağa qoyulmasını müzakirə edir.