Barak Obama administrasiyası Əfqanıstandan ABŞ qoşunlarının çıxarılmasının ləngidilməsi imkanlarını yenidən nəzərdən keçirir.

Axar.az xəbər verir ki, bu barədə informasiyanı "Vaşinqton Post" qəzeti özünün Ağ Evdəki mənbələrinə istinadən yayıb.

Məlumatda ABŞ və NATO qüvvələrinin Əfqanıstandakı rəhbəri general Con Kempbelə qoşunların çıxarılması işində tam sərbəstliyin veriləcəyi deyilib. Mənbə Vaşinqtonun bununla Əfqanıstandan əsgərlərin çıxarılmasının və Qəndəhar aeroportunun bağlanılmasının yubadılmasına çalışdığını söyləyib.

Qeyd edək ki, 2001-ci ildə Nyu Yorkda əkiz qüllələr partladıldıqdan sonra ABŞ dərhal Əl Qaidə və Talibanla mübarizə aparmaq üçün Əfqanıstana qoşun yeritdi. Obama prezident seçildikdən sonra ABŞ qoşunlarının Əfqanıstanı tərk edəcəyini bildirsə də, hələ də buna tam əməl edə bilməyib.