İranda güclü yağıntılar və daşqınlar nəticəsində indiyədək 4 nəfər həlak olub, 4 nəfər yaralanıb.

Axar.az Teleqraf.com-a istinadla xəbər verir ki, bunu İranın Təcili Yardım Təşkilatının sözçüsü deyib.

Onun sözlərinə görə, Sistan, Bəlucistan və Hörmüzqan vilayətlərinin hər birində 1 nəfər daşqınlarda boğulub, bir nəfər isə Hörmüzqan vilayətində uçqunlar altında qalaraq həlak olub.

İranın Qırmızı Aypara Cəmiyyətinin Yardım və Xilasetmə Təşkilatının sədri Mürtaza Səlimi isə bildirib ki, ötən 5 gün ərzində İranın 26 vilayətində 12 872 nəfərə yardım edilib, 3 132 nəfər müvəqqəti sığınacaqlarda yerləşdirilib.

Qeyd edək ki, son günlər İranın bir sıra vilayətində güclü qar və yağış yağması nəticəsində bir sıra yollar dağılıb, evlərə və infrastruktura ciddi ziyan dəyib.