Dərbənd Şəhər Administrasiyasının milliyətcə azərbaycanlı olan rəhbəri Mövsüm Rəhimov istefa verib.

Axar.az xəbər verir ki, bu məlumatı "Sadval"a yaxınlığı ilə seçilən "Ləzgi-yar.ru" saytı Dərbənd Şəhər Administrasiyasının Hüquq şöbəsinin rəhbəri Telman Mikayılova istinadən yayıb.

O, Rəhimovun bir müddət öncə Mahaçqalaya çağrıldığını və istefa etdiyini bildirib. Mikayılov onun istefa verməzdən bir az öncə milliyətcə avar olan Azadi Rəhimovu özünə müavin təyin etdiyini deyib.

Dərbənddəki azərbaycanlılar isə Axar.az-a bu məlumatın hələlik həqiqət olmadığını söyləyiblər:

"Mövsüm Rəhimovun vəzifədən getməsiylə bağlı hələlik rəsmi məlumat yayılmayıb və o, iş başındadır. Azadi Rəhimovla bağlı isə hələlik heç bir rəsmi məlumat yoxdur. Ləzgilər Yaraliyevi tam müdafiəyə qalxıblar. Onlar fevralın 27-də ləzgiləri yığaraq Yaraliyevə dəstək aksiyası keçirmək istəyirlər".

Qeyd edək ki, Dərbənd rəhbəri İmam Yaraliyevə qarşı bir müddət öncə cinayət işi qaldırılıb. Onun yaxın zamanlarda vəzifədən gedəcəyi gözlənilir. Yaraliyevin yerinə isə Moskva və Mahaçkalanın rəqibləri mübarizə aparır. Abdulatipov bu vəzifəyə keçmiş ədliyyə naziri Azadi Rəhimovu gətirmək istəyir. Moskva isə bu vəzifəni milliyətcə azərbaycanlı olan Xanlar Paşabəyova vermək niyyətindədir.

Mövsüm Rəhimov da Yaraliyevin yerinə iddialı olanlar sırasında idi.